Potch Gazette
Klein mannetjie met reuse planne vir Kersfees
’n Jong mannetjie genaamd Logan het besluit grootmense praat te veel en doen te min. Met sy projek, "Logan se Kersfeesprojek 2026: Little Hands, Big Heart", samel hy vanjaar kersgeskenke in vir behoeftige oumas en oupas.
Sy mikpunt is doodeenvoudig: hy wil seker maak senior burgers kry elkeen ’n bederfboksie met eetgoed, ’n klein geskenkie en ’n persoonlike kerskaartjie wat hy self skryf. Soos die projek se leuse sê, klein handjies het soms die grootste harte.
Borg ’n ouma of oupa vir net R50
Vir die prys van ’n wegneemkoffie kan enigiemand ’n verskil maak. Mense kan ’n ouma of oupa borg vir slegs R50.
Dié geldjies gaan reguit na die inhoud van die boksies toe. Enige kontantbydraes word gebruik om ontbrekende items aan te koop sodat elke pakkie propvol liefde bly.
Wat alles in die boksies beland
Vir diegene wat liewer self die winkels wil invaar en items wil skenk, soek Logan se span basiese bederfies en praktiese goed:
- Tee, koffie, suiker en langlewemelk
- Beskuit, koekies, sjokolade en ander lekkernye
- Toiletware soos seep en handeroom
- Warm sokkies of klein geskenkies
- Kerskaartjies en versierings
Elke boksie kry ook ’n handgeskrewe kerskaartjie van Logan self by.
Hoe om betrokke te raak
Enigeen wat ’n bydrae wil maak of items wil aflaai, kan direk met die span reël.
Belangstellendes kan ’n WhatsApp-boodskap stuur na 062-546-8704 om uit te vind waar en hoe om skenkings af te lewer.