JACOBUS gee sy gedagtes ’n stem met ‘Skree Vir Jou’
Die sanger en liedjieskrywer JACOBUS het vanjaar geen voet verkeerd gesit nie. Ná die sukses van sy enkelsnit “Mila”, wat hom sy eerste nommer-een-posisie op Apple Music besorg het, het hy voortgebou op dié momentum met “Verby Dans” en die duet “Probeer” saam met Demi Lee Moore.
Nou is hy terug met “Skree Vir Jou”, ’n nuwe enkelsnit wat luisteraars ’n voorsmakie gee van sy langverwagte debuutalbum, wat later in November vrygestel word.
“‘Skree Vir Jou’ gaan daaroor om soveel as moontlik te doen met die tyd wat jy het, ongeag of dinge verkeerd kan loop. Dit raak ook aan die gevoel dat jy soms met jouself praat en dink jy beleef herinneringe alleen, al is dit nie noodwendig die waarheid nie. Dit is eintlik ’n eerlike weerspieëling van wat destyds in my kop aangegaan het,” vertel JACOBUS.
Die nuwe enkelsnit sluit aan by die indie-pop-klank wat luisteraars reeds in “Mila” gehoor het. Volgens JACOBUS is dié genre na aan sy hart, en wou hy met die liedjie wys dat hy verskillende musikale rigtings kan verken sonder om sy eie identiteit prys te gee.
“Ek is mal oor sulke musiek en het gevoel ek moet vir die mense daar buite wys dat ’n mens ’n wye reeks verskillende goed kan uitreik en steeds jou eie gevoel behou.”
Hoewel JACOBUS nog nie te veel oor sy debuutalbum wil verklap nie, sê hy dit weerspieël sy gedagtes en ervarings deur die loop van die jaar.
“Dit vang my gedagtes deur die jaar vas – rou oomblikke, gelukkige oomblikke en alles tussenin.”
Die album beloof dus om ’n persoonlike blik op die kunstenaar se wêreld te bied, met al die emosies, ervarings en gedagtes wat deel vorm van sy reis.
Die musiekvideo vir “Skree Vir Jou” is in Stellenbosch verfilm, naby aan die plek waar die video vir “Mila” ook geskiet is. Vir JACOBUS was dit ’n geleentheid om musiek en vriendskap op ’n natuurlike manier bymekaar te bring.
“Dit is so lekker om sulke goed saam met pelle te doen. Dit is ’n wonderlike omgewing, en ek dink ’n mens kan in die video sien dat ons onsself eenvoudig geniet.”
Die video stel kykers ook aan JACOBUS se orkes bekend, met Olly Vans op kitaar en Jayden Eaton op tromme. Eaton is ’n oudleerder van JACOBUS se alma mater, Hoërskool Stellenbosch se buurinstelling, Hoërskool Helshoogte.
JACOBUS het groot waardering vir die talent en persoonlikhede waarmee hy die verhoog deel.
“Ek dink daar is min mense in die wêreld wat kitaar kan speel soos Olly. Hy is ook net ’n ongelooflike mens. Jayden is ’n talentvolle ou met ’n besondere aanvoeling vir die tromme. Dit is regtig ’n voorreg om sulke talentvolle mense bymekaar te kry.”
Aanhangers kan moontlik uitsien om dié musikante ook by toekomstige vertonings saam met hom op die verhoog te sien.
Met “Skree Vir Jou” bou JACOBUS verder aan die musikale verhaal wat hy vanjaar begin vertel het. En met sy debuutalbum wat binnekort verskyn, is daar nog baie om na uit te sien. Volg Jacobus Facebook : Kliek Hier Instagram : Kliek Hier YouTube : Kliek Hier