StroomCares: Gemeenskap Geroep om Klein Dogtertjie se Gehoor en Spraak te Beskerm

'n Plaaslike gesin vra die gemeenskap om hulp sodat hul dogtertjie 'n dringende en noodsaaklike mediese prosedure kan ondergaan.

Nadat sy deur 'n Oor-, Neus- en Keelspesialis (ONK) ondersoek is, is daar bevind dat die kleintjie trommelvliesbuisies (grommets) moet kry sowel as dat haar adenoïede (neusamandels) verwyder moet word.

Sy het tans 'n aansienlike hoeveelheid mukus en vloeistof agter haar trommelvliese opgebou, en die spesialis het dringend aanbeveel dat die operasies so gou moontlik uitgevoer word.Indien die toestand onbehandel bly, kan dit haar gehoor ernstig beïnvloed en uiteindelik haar spraak- en algehele ontwikkeling strem.

As ouers wil hul verseker dat sy die nodige behandeling sonder enige verdere vertraging ontvang.Die gesin se mediese fonds het egter bevestig dat hulle nie hierdie prosedure dek nie. Die totale private koste — wat die spesialis, narkotiseur en hospitaalfooie insluit — beloop ongeveer R36 000. Dit is 'n bedrag wat die ouers nie alleen kan bekostig nie.

Daar word dus nederig op die gemeenskap, vriende en familie beroep gedoen om finansiële bystand te verleen sodat die nodige fondse ingesamel kan word. Elke bydrae, ongeag hoe klein, sal 'n betekenisvolle verskil in hierdie klein dogtertjie se lewe maak. Diegene wat nie finansiële ondersteuning kan bied nie, word vriendelik gevra om die veldtog verder te deel.

Die gesin spreek hul opregte dankbaarheid uit teenoor elkeen wat hul storie lees, hul dogtertjie ondersteun en help om haar die beste kans te gee om optimaal te hoor, te praat en te ontwikkel.

Om te ondersteun - BackaBuddy